Գլաուկոմա. Սալուտեմ ամսագիր №3

Գլաուկոման հիվանդություն է, որն ախտահարում է տեսողական նյարդը և հանգեցնում անդառնալի կուրության։ Այն անդառնալի կուրության հիմնական պատճառներից է և նման հիվանդությունների շարքում գրավում է երկրորդ տեղը:

Ամբողջ աշխարհում 2010 թ. գլաուկոմայով հիվանդ մարդկանց թիվը կազմել է 60,5 մլն։ Ցավոք, կանխատեսվում է, որ 2022 թ. այդ թիվը կաճի` հասնելով մինչև 80 մլն: Ընդ որում, տարբեր էթնիկ և ռասայական խմբերում տարածվածությունը տարբեր է: Օրինակ, արևմտյան երկրներում առավելապես տարածված է գլաուկոմայի՝ բաց անկյուն, իսկ արևելքում` փակ անկյուն տարբերակը:

Առողջապահության բնագավառում գլաուկոման, կլինիկական և ֆինանսական առումով, համարվում է մեծ բեռ:

Կախված նրանից, թե առաջային խցիկի անկյան որ գոտիներն են երևում, տարբերում են բաց անկյուն, փակ անկյուն և խառը տիպի գլաուկոմա:

Գլաուկոմայով հիվանդների 74%-ը տառապում է բաց անկյուն գլաուկոմայով: Փակ և բաց անկյուն գլաուկոմաների ժամանակ տեսողության նվազման հիմնական գործոնը բարձր ներակնային ճնշումն է: Այդ պատճառով բուժման առանցքը համարվում է վերոհիշյալ գործոնի վրա ազդելը:

Համաճարակաբանական և կլինիկական փորձաքննությունները ցույց են տվել, որ ներակնային ճնշման օպտիմալ հսկողությունը նվազեցնում է հիվանդության առաջխաղացումը:

Գրեթե միշտ հիվանդությունն ընթանում է աննկատ, ուստի մարդիկ դիմում են բժշկի արդեն տեսողության զգալի վատացումով:

Գլաուկոման պահանջում է դինամիկ, երկարատև բուժում: Հիվանդության ձևերի տարբերակմամբ է պայմանավորված հիմնական բուժման հայեցակետը, քանի տեսակներից յուրաքանչյուրն ունի հիվանդության վարման և բուժման իր առանձնահատկությունը:
Բուժման ռազմավարության գործընթացում կարևորագույն տեղ ունի ախտորոշումը, քանի որ ճիշտ ախտորոշումից է կախված բուժման մեթոդի ընտրությունը` կոնսերվատի՞վ, լազերայի՞ն, թե՞ վիրահատական:

Գլաուկոմայով հիվանդների կյանքի որակը տուժում է, հիվանդությունն ազդում է նրանց ֆիզիկական, հուզական և սոցիալական վիճակի վրա:

Վահան Պապոյան
Ս.Վ. Մալայանի անվ. ակնաբուժական կենտրոնի վիրասրահի վարիչ

«ՍԱԼՈՒՏԵՄ» առողջ ապրելակերպի ամսագիր
Պետական գրանցման համար․ 211․200․00969
[email protected]
+(374) 91 64 10 15
+(374) 98 79 15 15

Հարցեր, պատասխաններ, մեկնաբանություններ